Mneder da la gruppa da lavur

Mneder da la gruppa da lavur

Segl es ün lö da vacanzas e da lavur attractiv e viv. La vschinauncha ho il böt da mantgnair zievamaun ün’infrastructura moderna.

Per planiser e mner que, es d’occuper da prümavaira la seguainta plazza:

mneder da la gruppa da lavur e mneder da progets da fabrica

El accumpagna progets i’l sectur da la construcziun bassa, dal trafic, da la cuntredgia e da la protecziun da l’ambiaint i’l territori cumünel. In quists sectuors es El la persuna da contact per abitantAs, proprietariAs, patrunAs da fabrica e planisedras e planiseders. El prepara Sias fatschendas per mauns da la suprastanza cumünela in möd autonom ed executescha las decisiuns trattas. El planisescha e realisescha ils differents progets da fabrica in connex cun l’ova, l’ova üseda e l’infrastructura turistica e generela, e que insembel culs indschegners externs incumbenzos. Sias lezchas cumpiglian eir la planisaziun dal mantegnimaint e da la modernisaziun da las infrastructuras e da las imsüras da construcziun idraulicas.

Scu mneder cun experienza maina El il team da la gruppa da lavur chi pissera per la preparaziun e’l mantegnimaint da las infrastructuras cumünelas e dals indrizs turistics. Impü Al sun suottamiss ils duos collavuratuors respunsabels pel provedimaint d’ova e l’alluntanamaint da l’ova üseda e pel implaunt electric pitschen da la vschinauncha.

El es respunsabel per la controlla dals rapports da lavur dals collavuratuors e furnituors e per la realisaziun da las lavuors scu eir per l’observaziun dals programs da lavur, dals böts in reguard a la garanzia da qualited, dals plauns
da piquet e da vacanzas. El es suottamiss al chef dal ressort infra-structuras da la suprastanza cumünela.

El dispuona scha pussibel d’üna furmaziun superiura i’l sectur da la tecnica da construcziun, per exaimpel scu mneder da fabrica dipl., survaglieder da fabrica cun perfecziunamaint in economia d’intrapraisa u sumgiaint, ed El ho experienza da professiun, da mner progets e da mner il persunel. Sia lingua materna es tudas-ch u rumauntsch cun bunas cugnuschentschas in taliaun. Sper ün’incletta solida da la tecnica da fabrica e d’implaunts es l’incletta pels interess d’üna vschinauncha turistica indispensabla.

Gugent spettainsa Sia annunzcha culla solita documainta ubain directamaing sülla pagina d’internet https://www.sils-segl.ch/offene-stellen.html ubain a la suprastanza cumünela da Segl.

Per dumandas Al sto il mneder da ressort Alfred Breu (079 438 90 28) u il
schef da persunel Stefan Brauchli (081 826 53 16) gugent a disposiziun.